Situata politike duket e tensionuar, një ditë përpara protestës së opozitës. Nga selia e PD, Sekretari i Përgjithshëm i kësaj force politike, Gazment Bardhi tha se thirrjet e policisë që në protestë do të ketë njerëz me rekorde kriminale nuk janë aspak të vërteta.
Sipas zotit Bardhi, se ku do të protestojë populli, këtë e vendos populli dhe jo kryeministri. “Në shesh do të jetë Populli i vjedhur dhe i varfëruar nga kjo bandë kriminale, duke protestuar kundër kësaj bande kriminale! Gjithashtu, njoftojmë Policinë Politike se asnjë nga rrugët në Tiranë nuk është më e rëndësishme se hapja e rrugës për të ardhmen, të cilët shqiptarët do ta realizojnë nesër me bashkimin më të madh pas pluralizmit politik. Rrugën tonë nuk ka fuqi të na e bllokojë! Aq më pak një polici e keqpërdorur nga një kryeministër frikacak apo akoma më keq, një polici që u përdor nga trafikantët e drogës për ta bërë Shqipërinë Kolumbinë e Europës”, deklaroi Gazment Bardhi.
Që herët në mëngjesin e kësaj të premteje, Policia e Shtetit nxitoi të njoftonte se persona me rekorde kriminale do të marrin pjesë të shtunën në protestë për të ushtruar akte dhune.
“Përveç deklaratave dhe retorikës së ndezur politike dhe thirrjeve për dhunë, të artikuluar nga disa përfaqësues të politikës dhe medias, Policia e Shtetit ka administruar edhe informacione se persona të caktuar, me rekorde kriminale apo të dënuar më parë për vepra të rënda penale, janë përgatitur për të ushtruar dhunë në protestën e datës 16 shkurt 2019, të organizuar nga Partia Demokratike. Në interes të mbarëvajtjes së protestës dhe të sigurisë së pjesëmarrësve në të, dhe të qytetarëve të tjerë, Policia e Shtetit ri-përsërit thirrjen drejtuar organizatorëve, që të distancohen nga zërat që inkurajojnë dhunë, si dhe nga personat me rekorde të rënda kriminale”, theksohet në deklaratë. Por nëse vërtet ka një plan të tillë, apo në protestë do të jenë njerëz me rekorde kriminale policia pse nuk i arreston?
