Kryetari i Bashkisë së Vaut të Dejës, Mark Babani ishte këtë të mërkurë në Tiranë, ku dorëzoi gjurmët e gishtërinjve pranë policisë shkencore dhe po përgatitet për mbrojtjen ndaj akuzave të ngritura ndaj tij nga Partia Demokratike.
PD e akuzon atë se është dënuar dhe dëbuar në vitin 1994 në Siçili për vjedhje makinash, pasi u arrestua me emrin e tjetërsuar Marq Babaj.
Por PD nuk u mjaftua me kaq. Numri dy i kësaj force politike ka publikuar një tjetër dokument, që sipas tij tregon arrestimin dhe dëbimin e përsëritur të Mark Babanit. Ky i fundit, sipas Gazment Bardhit u arrestua në Itali në vitin 1996 me emrin Fatmir Babaj.
“Mark Babani ka përdorur disa emra për të mbuluar të kaluarën e tij kriminale, por ai nuk mund ta fshehë dot të vërtetën. Partia Demokratike ka siguruar dokumente të tjerë, që provojnë përtej çdo dyshimi se përfaqësuesi i Edi Ramës në Vaun e Dejës është një kriminel dhe si i tillë duhet të ndëshkohet sipas ligjit. Përveç dokumentit për arrestimin në 1994-ën me një emër tjetër, dënimin, burgosjen dhe dëbimin nga Italia për vjedhjen e makinave në Siçili nga Mark Babani, Partia Demokratike disponon dokumenta që Mark Babani ka përdorur një identitet tjetër të rremë për të hyrë në Itali 2 vjet më vonë, në 1996-ën. Dokumenti që po paraqesim, që gjithashtu është nxjerr nga sistemi shtetëror i burgjeve në Itali, ka një element plus, të cilin Mark Babani nuk mund ta mohojë. Në këtë dokument është fotografia e tij me emrin Fatmir Babaj. Në vitin 1996, me këtë identet të rremë, krimineli i Edi Ramës në Vaun e Dejës, ka tentuar të hyjë në Itali, pasi ishte dëbuar për vjedhjen e makinave, por është arrestuar sërish nga policia italiane. Kartela e arrestimit tregon qartë se Mark Babani me emrin Fatmir Babaj kishte shkelur dënimin e gjykatës për dëbimin e tij nga Italia si hajdut makinash në vitin 1994. Policia italiane bëri lidhjen se Fatmiri në foto dhe Marku i Ramës në Bashkinë e Vaut të Dejës janë i njëjti person” tha Bardhi.
Sipas dokumentit Kryetari i Bashkisë së Vaut të Dejës u arrestua më datë 24 janar 1996 me identitetin e rremë Fatmir Babaj, dhe u mbajt në burg deri më datë 27 Janar 1996, ku u provua se ishte Marq Babaj, i dënuar në Itali për vjedhje në rrethana rënduese të kryer në bashkëpunim. PD thotë se dokumentet janë autentikë dhe janë marrë në sistemin Italian të burgjeve./ Opinion.al
