Pas protestës së banorëve të Unazës së Re ditën e sotme policia shoqëroi në komisariat disa nga protestuesit dhe ish-deputetin e Partisë Demokratike, Klevis Balliu. Në lidhje me këtë ngjarje reagoi ministri i Brendshëm, Sandër Lleshaj i cili tha se PD kishte përdorur gratë dhe fëmijët për të bllokuar rrugën por kjo gjë nuk do të tolerohej nga ana e policisë. Ndër të tjera Lleshaj shtonte se kjo nuk ishte rruga e adresimit të problemeve por qytetarët duhet ti drejtohen institucioneve.
Deklaratave të ministrit të Brendshëm iu është përgjigjur sekretari i përgjithshëm i PD, Gazment Bardhi i cili e ka akuzuar atë se jeton në 2 shtëpi të padeklaruara dhe se nuk mund ta kuptoje qëndresën për shtëpitë e ndërtuara me djerse
“Sander Lleshaj nuk mund ta kuptojë qëndresën e burrave, grave dhe fëmijëve në mbrojtje të shtëpive të tyre nga fadroma e korrupsionit të shefit të tij Edi Rama, sepse Sandër Lleshaj nuk ka derdhur ndonjëherë djersë për shtëpinë e tij.
Ai jeton në dy shtëpi të padeklaruara. Për njërën ka marrë kredi të butë nga qeveria që në 2009 dhe, në mënyrë të paligjshme, nuk e ka përdorur deri në vitin 2018, sa janë të dhënat zyrtare.
Shtëpia tjetër ku Sandër Lleshaj jeton është në Lalz, por ajo nuk figuron askund. Të gjithë e dinë që ministri katil, që nxjerr policinë kundër grave dhe fëmijëve, por nuk lufton krimin, jeton sa pranë qendrës së Tiranës, aq në Gjirin e Lalzit, në shtëpi të padeklaruara” deklaron Bardhi në emër të Partisë Demokratike.
Ndërkohë protestues të Unazës së Re dhe përfaqësues të Partisë Demokratike ndodhen përpara drejtorisë së policisë ku mbahen të ndaluar disa nga banorët dhe Klevis Balliu. /Opinion.al
