Kreu i Grupit Parlamentar të PD-së, Gazment Bardhi, kërkoi gjatë mbledhjes së Konferencës së kryetarëve të zhvilluar ditën e sotme, mbajtjen e një seance urgjente në Kuvend për mocion me debat dhe miratimin e rezolutës për ngjarjet e ndodhura në Veriun e Kosovës.
Bardhi tha se nuk mundet që Shqipëria të jetë e fundit, ndërkohë që PE e ka zhvilluar seancën urgjente për Kosovën.
“Është urgjente që të zhvillojmë mocionin me debat. Nuk mundet ne të jemi të fundit. PE e ka zhvilluar”,-u shpreh Gazment Bardhi.
Ndërkaq, kryeparlamentarja Lindita Nikolla ka pasur edhe një propozim për datën kur ky mocion mund të mbahej.
“Propozoj që debati bashkë me rezolutën të bëhen më 19 Tetor”,-propozoi Nikolla,
“Nuk mund të nxitojmë. Çdo rezolutë duhet të mbajë ndër mend pozicionin e Shqipërisë që ka në NATO dhe në çdo organizëm. Data mund të rishikohet që të jetë më shpejt, ndoshta të enjten e seancës. Por të hënën nuk mund ta bëjmë dot”,-tha Bledi Çuçi.
“Shembullin për rezolutë të përbashkët na e dha Kosova. Nuk e kemi kompleks. Rëndësi ka vullneti, mund ta arrimë edhe të hënën”, u shpreh Jorida Tabaku.
