Bardhi i përgjigjet Braçes: Firma jote në projektin e rikthimit të kumarit

Sekretari i Përgjithshëm i PD, Gazment Bardhi i ka kthyer përgjigjie zv/kryeministrit Erion Braçe pasi ky i fundit sfidoi PD për t’i nxjerrë vetëm një rast në administratën publike që është shantazhuar për t’u angazhuar me PS apo i është dorëzuar formulari.

Bardhi e quan retorikën e Braçes një “mashtrim bajatë” dhe sjell në mendje përgjimet e dosjes 184 dhe 339 ku sipas tij janë shantazhuar administrata dhe mësuesit për të votuar PS.

Në statusin e tij në Facebook, Bardhi i kërkon kryeministrit të flasë për firmën e tij në projektin e rikthimit të kumarit në Tiranë.

STATUSI NGA GAZMENT BARDHI

Erion Braçe të mos fyejë shqiptarët, se nuk i hanë më mashtrimet bajate! Ata i kanë parë erionbraçet e PS në dosjen 184 dhe 339 duke shantazhuar administratën dhe mësuesit për të votuar PS. Formulari është shpërndarë nga PS dhe këtë Erion Braçe e di shumë mirë. Po aq mirë e dinë punonjësit e ndershëm të administratës publike që sot ndjejnë mbi kurriz presionin e bandës në pushtet.

Presioni ndaj administratës për të favorizuar në zgjedhje partinë në pushtet, është vepër penale. Erjon Braçe dhe kushdo tjetër bën mirë ta mësojë këtë! PD është e vendosur të përballë këdo me ligjin për çdo shkelje.

Një hetim serioz, duhet të nisë që tani, për të zbuluar kupolën e PS, të përfshirë në shkelje ligji, jo vetëm me presionin ndaj administratës, por edhe për pazaret e dëshpëruara me bandat! Dhe meqë jemi tek pazaret me bandat: Erion Braçe bën mirë të flasë për firmën e tij në projektin e rikthimit të kumarit në rrugët dhe kullat qendrore të Tiranës./ Opinion.al