Gerard Pique sonte u tregua shumë i drejtpërdrejtë me fjalët e tij për paaftësinë e Barcelonës për të gjetur fitoren në stadiumin “Anoeta” për të shtatin vit radhazi. Qendërmbrojtësi pranoi se “kështu do të jetë shumë e vështirë për të fituar La Liga-n”, duke iu referuar lojës së dobët kundër Real Sociedad-it. Arsyeja është e thjeshtë: barazimi 1-1 nuk qe aksidental, por një pikë e fituar me meritë nga vendësit. Duke folur në “Movistar+”, Pique nënvizoi: “Ato që më shqetësojnë më pak tani janë dy pikët që na ndajnë më tepër nga Real Madrid. Kemi dhënë shumë pak gjëra, për të mos thënë aspak.”
Më pas, lojtari i kombëtares spanjolle u njohu meritat rivalëve duke mos e fshehur faktin se Real Sociedad qe qartësisht superior ndaj shokëve të tij të skuadrës. “Ata na bënë presion shumë mirë, nuk kemi si t’ua heqim meritat për këtë. Na bënë presion shumë lart dhe nuk na lejuan të bënim lojën tonë. Mendoj se është një rezultat i drejtë.” Pavarësisht dhimbjeve prej goditjes që mori në kaviljen e këmbës së djathtë, Pique tha se pret që të rikuperohet sa më shpejt për ndeshjen e së shtunës me Real Madrid-in. “Kavilja më ka dhembur shumë në pjesën e parë, por shpresoj të luaj në klasike“, – përfundoi ai.
