Ky sezon për Barcelonën ka dhënë disa indicie shumë të rëndësishme. Pas disa vitesh, ku peshën më të madhe të skuadrës e ka mbajtur sektori i të rinjve që nxirrte talente me shumicë, tashmë katalanasit duhet të hidhen në merkato. “Cantera” e famshme nuk po prodhon ato për të cilët ka shumë nevojë skuadra aktuale dhe ajo që duhet të përgatitet për në vitet e ardhshme. Nevoja kryesore janë dy mbrojtës krahu dhe një mesfushor organizator, sepse që pas largimit të Ksavit, as Rakitiç, apo akoma më shumë Andre Gomes i paguar 50 milionë euro (shumë ku përfshihen edhe bonuset ndër vite për Valencian) nuk kanë dhënë as çerekun e rendimentit që ofronte spanjolli, i cili tashmë luan në Katar. Klubi ka vënë në dispozicion 100 milionë euro për merkaton, por kjo shifër mund të “fryhet” edhe më shumë, duke llogaritur edhe shitjet e zyrtarizuara që do të jetë mbrojtësi Zheremi Matjë dhe mesfushori Arda Turan.
MBROJTËSIT E KRAHËVE
Dëshirat dhe objektivat e Barcelonës janë të qarta. Për sa u përket krahëve, dy emrat e përzgjedhur janë Hektor Bejerin i Arsenalit dhe Teo Hernandez në pronësi të Atletikos së Madridit, por që luan i huazuar tek Alavesh. Për të parin oferta do të jetë 30 milionë euro, ndërsa për Hernandez, ai ka një klauzolë prej 25 milionë eurosh, e cila pritet që të paguhet në federatë nga Barça, me vetë lojtarin që nuk do ta humbte rastin për të kaluar në një klub kaq madhështor sa ai kuqeblu.
KUTINJO OSE VERRATI
Ndërkohë, ëndrrat e mesfushës janë dy. I pari është braziliani i Liverpulit, Filipe Kutinjo, për të cilin është gati jo vetëm një shifër prej 50 milionë eurosh, por futja në tratativë edhe e turkut Arda Turan. Ky i fundit është një prej objektivave të trajnerit të të kuqve, Jurgen Klop, prandaj Barcelona shpreson që edhe shuma e parave që do t’i shtohet do të mjaftojë për të bindur anglezët që të lënë të lirë brazilianin.
Ndërkohë, Verrati është pa dyshim emri më i madh dhe ndoshta lojtari që do t’i bënte më shumë punë mesfushës së Barcelonës. Për PSG-në janë bërë gati 60 milionë euro, por ashtu si në rastin e Liverpulit edhe kartoni i Arda Turanit, plus ai i Zheremi Matjës.
Shifra totale e ofertës duke llogaritur edhe vlerën e dy lojtarëve do të prekte 100 milionë eurot, por më shumë sesa PSG-ja, e cila nuk është se ka nevojë për parà, do të jetë vetë fantazisti italian, Marko Verrati, ai që do t’i jepte zgjidhje kësaj tratative, sepse lojtari po e mendon seriozisht largimin nga Parisi.
