Barcelona është finalistja e dytë e Kupës së Mbretit në Spanjë. Blaugranat fituan në “Mestalla” kundër Valencia-s me rezultatin 0-2. Golat për katalanasit u shënuan nga Philipe Coutinho dhe Ivan Rakitic. Takimi i parë i luajtur në “Camp Nou” përfundoi me rezultatin 1-0 për ekipin e drejtuar nga Ernesto Valverde.
Për Valencia-n ishte e pamundur që të shënonte gol, pavarësisht se në këtë takim djemtë e Marcelino-s bënë një lojë më të mirë se sa në sfidën e parë, kjo edhe të mbështetur nga publiku i tyre. Vendasit patën dy rastet më të mira për gol me Gaya-n dhe Rodriguo-n.
Barcelona do të përballet në finalen e Kupës së Mbretit me Sevilla-n, e cila mposhti të mërkurën Leganes-in me rezultatin 2-0 (3-1). Ky është sezoni i pestë radhazi që ekipi katalanas arrin në finalen e Kupës së Mbretit. Më 21 prillin e ardhshëm do të vendoset fituesi i këtij trofeu.
Pjesa e parë nisi mjaft e luftuar mes të dyja skuadrave. Valencia vuajti jo pak për të goditur portën e blaugranave. Vendasit patën një shans shumë të mirë për të gjetur golin e parë kur Rodrigo gjuajti me kokë, në minutën e 13-të, por topi goditi traun e portës. Më aktivi për miqtë ishte Lionel Messi i cili krijoi disa raste të rrezikshme por gardiani Jaume arriti që të menaxhonte mirë situatat.
Në 20 minutat e para ishte Barcelona që mbajti kontrollin e topit, por vendasit treguan rritje në lojë e tyre. Rodrigo rrezikoi prapë në të 26, por portieri Cillesen priti. Për katalanasit sërish reagoi Messi ndërsa në fund të pjesës së parë edhe Luis Suarez rrezikoi portën kundërshtare.
Pjesa e dytë nisi e vrullshme për të dyja ekipet. Pas 2 minutash, Daniel Parejo pasoi për Rodrigo-n, i cili gjuajti me të majtën, por goditja u bllokua. Por 1 minutë më vonë vendasit u tronditën. Philipe Coutinho shënoi pas një krosimi të dhënë nga Luis Suarezi duke zhbllokuar rezultatin.
Ky është goli i parë me fanellën blaugrana për brazilianin, i cili u fut në nisje të pjesës ë dytë në lojë, pasi zëvendësoi Andre Gomes-in. Disavantazhi zgjoi Valencia-n, që u bë më kërkuese në portën e Barçës. Në të 72’, Coutinho rrezikoi me një gjuajtje më të djathtë. Zaza u përgjigj me një goditje me kokë pas 2 minutash. Në të 81’ erdhi goditja përfundimtare ndaj Valencia-s. Pas një pasimi të Luis Suarez-it, Ivan Rakitic me të djathtën mposhti portierin Jaume për herë të dytë në këtë takim. Deri në përfundim, ishte e lehtë për miqtë të menaxhonin rezultatin./eduasportin.com
