Tirana ka organizuar për herë të parë një tryezë rajonale për çështjet e barazisë gjinore, me përfaqësues të Bankës Botërore dhe partnerë ndërkombëtarë, mes të cilëve Kryetarët e Mekanizmave Kombëtarë të Barazisë Gjinore të Bosnje-Hercegovinës, Gjeorgjisë, Kosovës, Maqedonisë, Moldavisë dhe Serbisë. Nga kjo tryezë është artikuluar edhe vendosja e një strukture të fortë kombëtare për barazinë gjinore, si një detyrim që rrjedh nga Konventa e Kombeve të Bashkuara dhe në përputhje me rekomandimet e ndryshme të raporteve të Bashkimit Europian.
Aktiviteti është realizuar nën kujdesin e Zëvendëskryeministres Senida Mesi në cilësinë e Koordinatores Kombëtares të Barazisë Gjinore dhe me kontributin e “UN Women” në Shqipëri.
Në fjalën e saj Zëvendëskryeministrja Mesi u ndal tek promovimi i barazisë gjinore si një prej shtyllave bazë në procesin e integrimit evropian të Shqipërisë.
Mesi nënvizoi faktin se Shqipëria shumë shpejt do të ketë një njësi koordinuese për forcimin e mekanizmit kombëtar të barazisë gjinore.
Kjo njësi e cila do të mbështesë punën e koordinatorit kombëtar të barazisë gjinore dhe do të sigurojë qëndrueshmëri më afatgjatë e bashkëpunim më të thellë me partnerët e donatorët.
Drejtoresha Rajonale e Bankës Botërore për Ballkanin Perëndimor Linda Van Gelder u shpereh se “Barazia gjinore i shërben ‘ekonomisë së zgjuar’ dhe në Ballkanin Perëndimor ka një hendek të vogël për sa i takon arsimimit mes burrave e grave, por ka një hendek më të madh kur vjen puna tek aksesi në tregun e punës”.
