Gjykata Administrative ka vendosur pezullimin e punës së një fabrike për prodhimin e asfalto-betonit e vendosur në Pezë Helmës. Në procesin e ngritur nga banorët e 5 fshatrave të Tiranës, Pezë Helmës, Kalaç, Ura e Beshirit, Menik, Pezë e Vogël kundër Bashkisë së Kryeqytetit, është vendosur pezullimi i ndezjes së fabrikës, deri në një vendim përfundimtar të Gjykatës.
Banorët protestuan së bashku me fëmijët e tyre, menjëherë një muaj pas hapjes së impiantit në janar 2018, për shkak të tymit dhe ndotjes së madhe të ambientit.
Nga muaji shkurt 2018, kur banorët ngritën zërin e tyre, çështja iu drejtua Gjykatës Administrative me prova dhe fakte të siguruara nga vetë ata. Pamje që tregonin tymin që dilte nga oxhaqet dhe përhapjen në të gjithë zonën.
Banorët thonë se nëse Gjykata dhe shteti nuk zbatojnë vendimin, do të jenë ata të cilët do të kundërshtojnë edhe më fort këtë katastrofë mjedisore.
Sajmir Lika, përfaqësues i banorëve tha: “Në momentin e parë që do të ndezin fabrikën ne do të ngrihemi të gjithë si zonë. Janë 6 fshatra, 12 mijë banorë. Do të ngrihemi me të madh e të vogël.”
