Banorët e Qafëzezës dhe Kolonjës, shtëpitë e të cilëve janë dëmtuar nga tërmeti i pak muajve më parë kanë protestuar ditën e sotme përpara Bashkisë së Ersekës.
Ata kanë kërkuar nisjen e ndërtimit të shtëpive nga Bashkia. Banorët janë të shqetësuar se dimri do t’i gjeje në qiell të hapur, sa kohë ende në Qafëzezë nuk ka filluar të ndërtohet asnjë shtëpi.
Ndërkohë një pjesë e banorëve, vijojnë prej dy muajsh vazhdojnë të jetojnë në çadra, ndërsa të tjerë, po kalojnë netët në makina apo kasollet e bagëtive.
Banorët janë shprehur se janë në pamundësi ekonomike për të riparuar vetë shtëpitë,ndërsa kanë rezerva edhe për procesin e vlerësimit të dëmeve,i cili sipas tyre është selektiv dhe i pabarabartë.
Gjithashtu ata kanë theksuar se kanë refuzuar dëmshpërblimin e ofruar për riparimin e shtëpive të dëmtuara,vlera e të cilit është vetëm 2 mijë lekë të reja.
Ata kërkojnë që t’iu ndërtohen shtëpitë, siç ka ndodhur me banorët e Floqit si dhe që ky proces të përfundojë pa ardhur dimri.
Nëse nuk do të marrin asnjë reagim të prekurit nga tërmeti janë shprehur se do të përshkallëzojnë protestat deri në bllokimin e rrugëve nacionale./Opinion.al/
