Banorët e fshatit të vogël kufitar të Gjermanisë Lindore, Küstrin-Kietz, po iu bëjnë thirrje për mbështetje fqinjëve polakë, të cilët mund t’i ndihmojnë ata të kundërshtojnë ngritjen e propozuar të një qendre deportimi për azilkërkuesit e refuzuar.
Aktualisht, 48 000 njerëz janë në pritje të dëbimit nga Gjermania, një proces që mund të zgjasë me vite. Qendra grumbullimi për këta persona ekzistojnë në Gjermani, por synohet që të shtohen strukturat e tilla, për shkak të numrit të lartë të refugjatëve. Një nga vendet e përgjedhura nga autoritetet gjermane ka qenë dhe fshati Küstrin-Kietz.
Küstrin-Kietz është shtëpia e 750 banorëve, kryesisht gjermanë, por ka edhe rreth 100 polakë. Para Luftës së Dytë Botërore, ishte një periferi e Kostrzyn nad Odrą, e ndarë nga lumi Oder. Sot, qytetet janë të lidhura me një urë. Në lumë shtrihet një ishull në pronësi gjermane, në të cilin po zhvillohen plane për të ngritur një vendbanim kontejnerësh për 250 të huaj që janë në pritje të dëbimit, pas kërkesave të dështuara për azil.
Rreth 15 000 polakë udhëtojnë çdo ditë nga Kostrzyn dhe zona përreth për të punuar në Gjermani, ndaj banorët e Küstrin-Kietz kanë bërë thirrje për mbështetje nga zyrtarët e pushtetit lokal polak. Banorët kanë frikë se të huajt do të tentojnë të kalojnë kufirin dhe kjo mund të përfshijë rritjen e kontrolleve kufitare, çka është diçka që ata nuk do ta dëshironin. “Qendra të tilla duhet të vendosen pranë aeroporteve në mënyrë që logjistika të jetë sa më e pak e komplikuar e jo në fshatra të largëta”, thonë vendasit.
