Banorët e Bërxullës të cilët kanë më shumë se 7 muajsh që protestojnë për të përfituar dëmshpërblimin për pronat e tyre sipas vlerës së tregut, kanë dalë ditën e sotme në protestë duke bllokuar njërin kah të rrugës së Rinasit.
Banorët u shprehën se nuk do të heqin dorë nga kërkesa e tyre sepse ende nuk kanë marrë një përgjigje të caktuar për zgjidhjen e problemit.
“Do shkoj në Hipotekë të martën për të gjitha procedurat që i kam çuar drejtorit të Hipotekës aty. Dosjet që kanë mangësi duhet të plotësohen. S’duam që të bëhen dokumente për të na mbyllur sytë, por të jetë e kompletuar.
Jam kundër votimit, të gjitha banorët e fshatit s’duhet të marrin pjesë në votime.Arsyeja dihet, 7 muaj nuk kemi një përgjigje se ç’do bëhet me këta banorë. Duhet të vijnë të ulen me ne, në publik në praninë e mediave. Të bëjnë deklarata për shtyptë na tregojnë se si do të zgjidhet.
Gjurma është bërë me Google, jo me gjurmë në terren. Situata është bërë gangrenë, është maskaradë e madhe. As vetë nuk i japin zgjidhje, sepse i ka ngelur në dorë projekti.
Do të rezistojmë deri në ditën e fundit, ky projekt na shkatërron neve si fshat. Kryeministri urgjentisht të vijë këtu, protesta do vazhdojë. Nuk dihet se si do të shkojnë punët”, thanë banorët.
Sipas tyre, kompania që ka fituar koncesionin, ka nisur punën në terren pa pasur një leje ndërtimi dhe në kundërshtim me ligjin duke theksuar se dëmshpërblimi i ofruar është qesharak. Ata kanë kërkuar që Prokuroria e Posaçme kundër Korrupsionit dhe Krimit të Organizuar (SPAK) të nisë hetimet për projektin. /Opinion.al
