Një turist polak ka mbetur i plagosur rëndë pasi është rrëzuar në vendin e quajtur Maja e Harapit në zonën e Thethit.
Mësohet se turisti ka rënë nga një lartësi e madhe dhe se ka thyer të dyja këmbët. Për shkak të pamundësisë për të ecur, sipas policisë, ai ka telefonuar në numrin në numrin 112 për të kërkuar ndihmë.
Kjo ngjarje ka ndodhur rreth orës 18:30 ndërkohë që janë lajmëruar emergjencat civile.
Për shkak të orës së vonë dhe errësirës, nuk u bë dërgimi i helikopterit banorët vendas së bashku me Policinë janë vënë në kërkim të turistit.
Rreth orës 21.30 është bërë e mundur gjetja e turistit polak, si dhe transportimi i tij deri në rrugën e makinës.
Turisti është dërguar më pas në qendrën shëndetësore të Thethit dhe pas ndihmës së parë mjekësore rezultoi se nuk kishte asnjë rrezik për jetën.
Njoftimi i policisë:
Rreth orës 19.00, shtetasi W. M., 20 vjeç, turist nga Polonia, duke eksploruar zonën e Thethit, ka dëmtuar këmbën në disa shkëmbinj në majën e Harapit, në Theth Shkodër.
20-vjeçari ka njoftuar në numrin 112 duke kërkuar ndihmë, pasi nuk ecte dot për shkak të dëmtimeve të marra në këmbë.
Për shkak të orës së vonë dhe errësirës, ishte i pamundur dërgimi i helikopterit dhe në këto kushte punonjësi i policisë së zonës Theth ka njoftuar banorët, të cilët së bashku me Policinë janë vënë në kërkim të turistit.
Rreth orës 21.30, banorët e zonës së bashku me punonjësin e Policisë kanë bërë të mundur gjetjen e turistit polak, si dhe transportimin e tij deri në rrugën e makinës. Më pas 20-vjeçari është transportuar me autoambulancë në qendrën shëndetësore të Thethit dhe pas ndihmës së parë mjekësore rezultoi se nuk ka asnjë problem për jetën dhe as dëmtime serioze fizike.
Turisti polak W. M ka falënderuar banorët e zonës dhe policinë që i erdhën në ndihmë duke i shpëtuar jetën.
Policia e Shkodrës gjen rastin të falënderojë edhe njëherë banorët e zonës së Thethit, të cilët i janë përgjigjur thirrjes së Policisë në çdo rast që u është kërkuar për t’u ardhur në ndihmë turistëve dhe vizitorëve të huaj, duke treguar dhe përcjellë tek ata vlerat më të mira të vendit tonë./ Opinion.al E.Xh.
