Këshilli Mbikëqyrës i Bankës së Shqipërisë vendosi këtë të mërkurë të ulë normën bazë të interesit nga 2.75% në 2.50%, në kuadër të një politike më të lehtësuar monetare.
Vendimi i bë i ditur nga guvernatori Gent Sejko gjatë një konference për shtyp, ku paraqiti raportin e ndërmjetëm të politikës monetare për tremujorin e dytë të vitit 2025.
Sipas Sejkos, zhvillimet ekonomike dhe financiare në vend kanë qenë pozitive gjatë këtij viti, megjithëse inflacioni dhe ritmi i rritjes ekonomike kanë qenë në kufijtë e poshtëm të pritshmërive. “Këto zhvillime kanë qenë në linjë me pritjet tona”, tha ai.
Përveç uljes së normës bazë të interesit, Këshilli vendosi të reduktojë edhe:
normën e interesit të kredisë njëditore nga 3.75% në 3.50%;
normën e interesit të depozitës njëditore nga 1.75% në 1.50%.
Guvernatori theksoi se qëllimi i kësaj lëvizjeje është për të nxitur rritjen e kreditimit dhe për të krijuar kushte më të mira për stabilitetin e çmimeve dhe të kursit të këmbimit. “Vendimmarrja krijon kushte monetare më të përshtatshme për kthimin e qëndrueshëm dhe në kohë të inflacionit në objektiv”, deklaroi Sejko.
Pjesë nga fjala e Gent Sejkos:
Sot, më 2 korrik 2025, Këshilli Mbikëqyrës i Bankës së Shqipërisë mori në shqyrtim dhe miratoi Raportin e Ndërmjetëm të Politikës Monetare për tremujorin e dytë.
Zhvillimet ekonomike dhe financiare në vend kanë vijuar të jenë pozitive gjatë dy tremujorëve të parë të vitit 2025. Aktiviteti ekonomik është rritur me ritme të qëndrueshme, inflacioni i çmimeve të konsumit është stabilizuar në nivele të ulëta, ndërsa tregjet financiare janë shfaqur të qeta dhe kushtet e financimit mbeten akomoduese.
Këto zhvillime kanë qenë në linjë me pritjet tona, ndonëse si ritmi i rritjes ekonomike dhe niveli i inflacionit ishin në kahun e poshtëm të tyre.
Parashikimet për zhvillimet ekonomike në të ardhmen mbeten pozitive. Vëllimi i aktivitetit ekonomik pritet të vijojë të rritet në horizontin afatmesëm, me ritme të afërta me potencialin, ndërsa inflacioni pritet të kthehet në objektiv në fillim të vitit 2026.
Megjithatë, sfidat nga mjedisi i jashtëm mbeten një faktor i rëndësishëm rreziku. Rritja e barrierave tregtare, pasiguritë mbi drejtimin e politikave ekonomike e tregtare, si dhe intensifikimi i konflikteve gjeopolitike po dobësojnë perspektivën e ekonomisë globale, duke krijuar rreziqe potenciale për zhvillimet në vend.
Në këtë kontekst, duke synuar të krijojë kushte më të përshtatshme monetare për përmbushjen e objektivit tonë të stabilitetit të çmimeve, Këshilli Mbikëqyrës e gjykoi të nevojshëm një lehtësim të qëndrimit të politikës monetare në mbledhjen e sotme.
Bazuar në sa më sipër, Këshilli Mbikëqyrës i Bankës së Shqipërisë vendosi:
të reduktojë normën bazë të interesit, nga niveli 2.75% në nivelin 2.50%;
të reduktojë normën e interesit të kredisë njëditore, nga niveli 3.75% në nivelin 3.50%.
të reduktojë normën e interesit të depozitës njëditore, nga niveli 1.75% në nivelin 1.50%.
Këshilli Mbikëqyrës gjykon se kjo vendimmarrje krijon kushte monetare më të përshtatshme për kthimin e qëndrueshëm dhe në kohë të inflacionit, në objektiv. Ajo rikonfirmon angazhimin tonë për kthimin e inflacionit në objektiv në një kohë sa më të shkurtër, si dhe krijon kushte më akomoduese monetare për rritjen e kreditimit dhe stabilitetin e kursit të këmbimit. Kjo lëvizje është në linjë me komunikimet tona të mëparshme për të ndjekur një politikë monetare fleksibël, të bazuar në të dhënat e reja, si dhe është konsistente me kahun lehtësues të politikës monetare të ndjekur nga Banka Qendrore Evropiane.
Këshilli Mbikëqyrës thekson se politika jonë monetare do të vijojë të udhëhiqet nga të dhënat më të fundit dhe, në veçanti, nga balanca e faktorëve që ndikojnë ecurinë e çmimeve në vend. Në një mjedis me pasiguri të lartë, kjo qasje garanton fleksibilitetin e nevojshëm për të reaguar në mënyrë efektive ndaj çdo devijimi nga parashikimet tona bazë dhe për të ruajtur stabilitetin monetar dhe financiar.
