Edhe pse kanë kaluar muaj që nga tërmeti tragjik i 26 nëntorit, shumë familje, shtëpitë e të cilave pësuan dëmtime, vijon të jetojnë në çadra ose janë rikthyer në banesat e dëmtuara. Një nga familjet që u prek nga tërmeti i 26 nëntorit është dhe Kallaku në njësinë administrative, Bubq, Bashkia Krujë.
Kryefamiljari Behar Kallaku gjatë një bashkëbisedimi me ish-deputeten e Partisë Demokratike, Oriola Pampuri, ka rrëfyer vështirësitë e pas tërmetit, ndërsa thekson se nuk është ndihmuar nga shteti. Sipas tij, shteti i ka krijuar zvarritje procedurale për ndërtimin e shtëpisë edhe pse ekspertët kanë deklaruar se banesa aktuale ka pësuar dëmtime të rënda dhe se duhet të shkatërrohet fare.
Por, Behar Kallaku thotë se bashkia nuk vepron pasi deklaron se rezulton me dy shtëpi, por ai thotë se ka vetëm një shtëpi dhe kjo është dëmtuar. Përveç shtëpisë së dëmtuar, familja Kallaku ka dhe djalin e paralizuar, gjë e cila e rëndon edhe më tepër situatën.
Behar Kallaku: Unë jam Behar Kallaku, banues i Njësisë Administrative Bubq. Mua tërmeti më goditi si të gjithë zonat tona dhe fatkeqësisht më është shembur dhe shtëpia. Unë kam përfituar një DS4 në bazë të ekspertëve që kanë ardhur të gjithë dhe akoma nuk më kanë dhënë një zgjidhje tamam zyrtare. Sipas bisedës që kam bërë me përfaqësues të bashkisë së Krujës, më kanë thënë që ti disponon dy shtëpia. Faktikisht unë kam vetëm një shtëpi, edhe kjo shtëpi më është shembur dhe tani jam jashtë.
Oriola Pampuri: Ndërkohë, kanë qenë ekspertët që kanë ardhur, e kanë vlerësuar dhe kanë vendosur që përfitoni DS4?
Behar Kallaku: Ekspertët. Ekspertët të gjithë, kanë ardhur dhe thanë e ke DS4. Urdhëro dokumentin, është DS4. Tani dyshojnë, por unë në fakt nuk kam shtëpi tjetër. Shtëpia është vetëm kjo këtu.
Oriola Pampuri: Domethënë ju në dokumentacion keni vetëm një shtëpi?
Behar Kallaku: Vetëm një shtëpi! Duke pa dhe situatën e vështirë, djali që është i paralizuar dhe problemet e tjera ekonomike të miat, unë nuk e përballoj situatën me këto financa që kam. Prandaj kërkoj nga Bashkia e Krujës, të më një japin një urdhër, një vendim të saktë, zyrtar, a kam përfituar DS4, po se jo. Nuk i kërkoj asgjë tjetër! Nuk ka gjë të keqe edhe po më thanë jo. Është më e ndershme të më thonë jo, sesa po, me na stresu. Na kanë çuar në një stres të paparë, saqë ata nuk e kuptojnë, asnjë, çfarë stresi kemi ne!/ Opinion.al
