Në mbledhjen e Komisionit të Ekonomisë, Deputeti i PS, Erjon Braçe, deklaroi se banditët kanë marrë toka me qera parandaj dhe sipas tij duhen audituar menjëherë kontratat e tyre. Sipas Braçes, bëhet fjalë për zonat e Delvinës, Përmetit dhe më lart.
Deputeti socialist u shpreh se nuk duhet të pritet derisa SPAK te sekuestrojë pronat e këtyre personave, por duhet kryer auditimi ligjor që tokat t’i kthehen shtetit ose komunitetit.
“Janë disa kontrata që dhënies së tokës me qira që kanë përfunduar në duar të këqija, madje po vriten për ato kontrata. Sot që flasim janë djerrë. Mundet që dikush të ketë investuar ca para por bujqësi nuk po bën me to. Ka mundësi që ju të auditoni sa më parë këto kontrata dhe të prishni kontratat ku rezultojnë persona të papërshtatshëm sepse janë banditë. Mos presim që SPAK të verë sekuestrimin e pronave të tyre. Nga poshtë në Delvinë Përmet dhe më lart. Pra të bëhet një auditim i vlefshmërisë së këtyre kontratave në raport me detyrimet kontraktuale që kanë pasur për të ushtruar veprimtari bujqësore deri tek rakordimet me institucionet ligjzbatuese derisa të marrë mbrapsht shteti atë që i takon, para se institucionet e tjera ligjzbatuese të marrin masat e tyre. Nuk e di e sata ministre jemi që ua them. Askush nuk bën asgjë për këtë. Ndërkohë në zonat si puna e Fierit edhe vriten për këtë. Do jetë mirë që sa më parë të bëhet auditimi ligjor, auditimi i kontratave dhe të kthejmë pas tek shteti atë sipërfaqe toke që është e fundme që mund të përdoret fare mirë nga të tjerë njerëz, për të bërë bujqësi dhe për të siguruara të ardhura”, u shpreh Braçe.
