“Person i ndyrë i kombit shqiptar. Fëlliqësirë… intrigant” një sërë sharjesh e akuzash ka rreshtuar anëtari i këshillit bashkiak Shkodër, Mustafë Lici ndaj gazetarit investigativ Artan Hoxha. Reagimi i ashpër vjen pasi një natë më parë, gazetari deklaroi në studion e “Opinion” se në Shkodër janë disa banda kriminale dhe jo vetëm “Bajri”. Ndonëse nuk përmendi emra, ai tha gjithashtu se kjo familje përfaqësohet në Këshillin Bashkiak të Shkodrës me një subjekt politik lokal. Një ditë pas emisionit, Mustafë Lici doli para mikrofonëve të mediave për të akuzuar Artan Hoxhën se po përhap panik dhe frikë në Shkodër. Sipas tij, gazetari “po rrit fëmijët me bukë haram”.
“Ky person i inkriminuar ka ringjallur dhe mundohet të hapë panik mes fiseve e qytetarëve të Shkodrës. Gazetari i krimit i cili ka vendosur të rrisë fëmijët me paratë e krimit dhe me bukë haram, nuk mundet 6 vrasjet e Shkodrës t’i atribuojë si vrasje bandash e të krahasojë modelet. Të gjithë të vrarët në qytetin tim, i njohin kriminelët dhe i dinë kush janë. Shkodranët janë të zgjuar. Familja Lici ka marrëdhënie të shkëlqyera me familjet e viktimave të qytetit. Artan Hoxha, është në shërbim të krimit të organizuar të familjes Bajri”, tha Lici për mediat.
Video: Shihni më poshtë deklaratën e plotë të tij.
