Mario Balotelli ka udhëtuar në Nice për të biseduar me klubin francez nëse mund ta kalojë në Ligue 1 sezonin e ardhshëm, zbulon ekskluzivisht “Goal“. Deri tani nuk është arritur ndonjë marrëveshje ndërmjet palëve. Sulmuesi italian, i cili është në pronësinë e Liverpoolit, duhet të konsiderojë nëse skuadra e trajnerit Lucien Favre mund ta ndihmojë për t’u ringritur pas sezoneve të fundit zhgënjyese në Premier League dhe Serie A. “Unë nuk e njoh Marion personalisht, por nëse ai punon dhe dëshiron të ndihmojë të rinjtë, pse jo? Nëse ai nuk dëshiron, atëherë s’ka shans të vijë këtu”, – është shprehur zvicerani, i cili më parë ka drejtuar skuadrën gjermane Borussia M’Gladbach.
“Të kuqtë” po shpresojnë që bisedimet të arrijnë në një përfundim pozitiv dhe italiani të mund të largohet në Francë. 26-vjeçari u transferua në “Anfield” para dy vitesh për 16 milionë euro nga ish-trajneri Brendan Rodgers, por synimi i vetëm i drejtuesve të klubit anglez është të mos i paguajnë rrogë lojtarit problematik, duke preferuar kështu shitjen e tij. Kontrata aktuale e Balotellit përfundon në vitin 2017, kështu që edhe huazimi do të thoshte largim përfundimtar për të. Edhe FC Sion ka shprehur interes për ish-sulmuesin e Interit, por duket se destinacioni i tij i radhës do të jetë Nice.
