Mario Balotelli ka rrëfyer se që kur ka qenë i vogël ka qenë pre e racizmit nga shokët e tij.
Kjo gjë vërtetohet edhe në librin e publikuar nga gazetari Alesandro Alçato, ku ka dhe një rrëfim të vetë futbollistit.
“Patjetër, po të isha i bardhë do të kisha pasur më pak probleme. Marr kaq shumë letra nga fëmijë që më quajnë një shembull në luftën kundër racizmit. Ka qenë e turpshme, të më përplasej dera në fytyrë për 18 vite.
Dyert mu hapën vetëm kur u bëra nënshtetas italian, por jam trajtuar njësoj si më parë. Sa herë që zhdukeshin disa çokollata në shkollë, menjëherë isha unë i akuzuari.
Gjithsesi, ka një incident që nuk kam për ta harruar kurrë, pasi nuk qava më… Kisha bërë detyrat e shtëpisë. E dija që mamaja do të më linte të luaja futboll përjashta.
‘Çuna a mund të luaj edhe unë?’ ‘Jo Mario, ti je i zi.’ Unë isha i zi dhe në syrin e tyre isha ndryshe. Mendoja se mua nuk më donin sepse isha i pasur edhe në atë kohë, por teksa vitet kaluan, për fat të keq e zbulova të vërtetën.
Në vitin 2009, përjetova këto gjëra. Gjatë një ndeshje Juve-Inter, më quajtën ‘majmun’, ‘zezak’, ‘kthehu në Afrikë’ dhe më kanë fërshëllyer. Incident i dytë ndodhi në qershor, jashtë një lokali në Romë me shokët e mi tek U-21. Teksa po bisedonim, një motoçikletë erdhi nga shumë larg dhe njerëzit që ishin mbi të bërtitën ‘zezak’. U afruan dhe më hodhën një tufë me banana” është shprehur Balotelli.
Tashmë Balotelli është rikthyer tek kombëtarja italiane, pas më shumë se tre vjet mungesë në kombëtare, duke realizuar dhe gol në ndeshjen miqësore që Italia zhvilloi ndaj Arabisë Saudite.
