Antony Blinken, Sekretari i Departamentit Amerikan të Shtetit, ka anuluar vizitën e tij zyrtare në Kinë, pas zbulimit të një balone në hapësirën ajrore të SHBA-së, për të cilën amerikanët deklarojnë se ishte një mjet spiunazhi.
Sipas BBC, Blinken do të zhvillonte një takim me homologun e tij në Kinë, si dhe Presidentin e vendit, Xi Jinping.
Një vizitë e tillë do të zhvillohej pas tensioneve të fundit mes SHBA-së dhe Kinës. Për çështjen e balonës, Kina kërkoi ndjesë ndaj SHBA-së teksa sqaroi se ajo ishte një pajisje për qëllime meteorologjike.
Në një deklaratë zyrtare, Ministria e Jashtme e Kinës thotë se balona kishte dalë nga rrjedha e rrugës së përcaktuar.
