Nga: Aldo Baxhaku
“Kjo autostradë do të kushtojë 0.075 euro për kilometër ose ndryshe 7.5 euro për kilometër”.
Kjo ishte deklarata e Ministres së Infrastukturës dhe Energjisë, Belinda Balluku sot në foltoren e parlamentit. Padyshim që deklarata ka një lapsus pasi ministrja ka dashur të thotë 7.5 euro për 100 kilometra.
Bëhet fjalë për projektin e shumë përfolur të rrugës Milot – Fier, me kosto 1.118 milionë euro që u prezantua një javë më parë.
Opozita e sulmoi këtë projekt duke akuzuar kryeministrin dhe ministren se kostot janë të shtuara. Ndër të tjera në akuzat e opoiztës ishte dhe fakti se një udhëtim vajtje ardhje në këtë segment do të kushtojë 17.4 euro.
Me një gjuhë të ashpër dhe tepër e revoltuar, ministrja e kundërshtoi këtë shifër duke thënë se rruga nuk paguhet vajtje ardhje por me segmente dhe se për një kilometër automjetet do të duhet të paguajnë 0.075 eur.
Në fakt, përllogaritja tregon që në shifrën e dhënë nga opozita, me atë të deklaruar nga ministrja ka një gabim vetëm me 0.15 euro
Autostrada Milot-Fier është e gjatë 115 kilometra sipas projetit të prezantuar nga qeveria. Me një llogari të thjeshtë matematikore rezulton se kostoja nga Miloti në Fier është 8.625 euro. Që do të thotë se vajtje-ardhje kushton 17.25 euro.
Llogaria është pothuajse e njejtë dhe kërcënimi që ministrja bëri se punët u dashkan zgjidhur nëpër gjykata duket jo i mirë menduar por një përpjekje për të sulmuar opozitën të cilën shpesh herë e etiketoi si “zëdhënës të qametit”.
E për ta mbyllur fjalën e saj me nota bibliko moraliste, Balluku tha se më në fund Shqipërinë e ka parë zoti tani që është kjo qeveri dhe se opozita po e çmend këtë milet.
“Ne jemi qeveria e ndërtimit, ju keni qenë qeveria e shkatërrimit. Zoti është i madh dhe e ka parë Republikën e Shqipërinë më në fund dhe nuk do të vijë më dita, se më pëlqen shumë kur thoni kur do vijmë ne do shkatërrojmë këtë do bëjmë atë, e çmendët këtë popull, sidomos në kohët e covidit kur dëgjon që oferta e re e njërit që do të vijë në qeveri është njëri që do të prishi këtë dhe do të shkatërrojë atë, sinqerisht ju po ndikoni psikollogjikisht në jetën e qytetarëve të shqipërisë. Nuk e kuptoj si nuk uleni të punoni për programin tuja. Do bëni program ju? Do dalim të garojmë?”, tha ministrja Balluku./ Opinion.al
