Qeveria ka si synim që brenda kësaj vere të përfundojë rrugën Qukës-Qafë Plloçë.
Zv/kryeministrja, njëherazi ministre e Infrastrukturës dhe Energjisë, Belinda Balluku, ishte në kantier këtë të martë për të inspektuar punimet.
“Synojmë që ta mbyllim këtë vepër dhe ta dorëzojmë brenda fundit të kësaj vere. Pra brenda kësaj duam që të dorëzohet Qukës-Qafë Plloça”, u shpreh Balluku.
Ministrja u shpreh se puna për lotin e tretë të rrugës ka zgjatur për dy faktorë. Së pari, kompleksiteti gjeologjik i vështirë dhe së dyti projekti i rrugës që ishte i padetajuar, sipas Ballukut.
“Rëndësi ka që tani jemi në fazën finale, ku financimi është siguruar, të tri fazat e këtij projekti po ecin në mënyrë të konsiderueshme duke qenë se në një të përgjithshme të projektit jemi në 85% ecuri në të tri fazat e saj”, u shpreh ajo.
Balluku nënvizoi se puna në këtë kantier zgjat deri në fund të vjeshtës pasi në dimër nuk funksion si pasojë e motit të ftohtë.
Prandaj ajo kërkoi që të merren masat edhe për mirëmbajtjen e kësaj rruge, pasi ndodhet mbi 1200 metra mbi nivelin e detit në pikën më të lartë.
Kujtojmë se në vitin 2016 qeveria vendosi ta rikonceptojë projektin e rrugës pasi projektuesit thonë se ka pasur shumë defekte që kanë të bëjnë me sigurinë rrugore.
