Zvendës/kryeministrja dhe njëherazi ministrja për Infrastrukturën dhe Energjinë, Belinda Balluku në konferencën për energjinë u shpreh se në fund të muajit Mars do të aktivizohet Bursa Energjitike Shqiptare, ALPEX.
Ndër të tjera gjatë fjalës së saj, Balluku u shpreh se kriza energjetike vuri vendin tonë para një sfide shumë të madhe, duke sjellë edhe kufizim të investimeve në sektorin energjitik.
“Kriza energjitike na vuri para një sfide shumë të madhe. U detyruam të kufizonim shumë nga veprimtaritë tona ashtu siç është edhe kufizimi i investimeve në sektorin energjetik. Gjithashtu ky është një vit i shënuar pasi duhet të them që marsi është muaji kur ne do të kthejmë operative dhe do të jetë tashmë një e re e shumëpritur, Bursën Energjetike Shqiptare. E kemi deklaruar disa herë si kohë dorëzimi, por gjithmonë ka pasur problematika pasi ne nuk punojmë vetëm, punojmë me partnerë dhe partnerët padyshim ndikohen nga krizat, nga problematikat dhe gjithçka tjetër, kështu që na është dashur ta shtyjmë disa herë afatin e dorëzimit, por të gjitha palët tashmë deklarojmë se fundi i Marsit do të jetë data e shumëpritur e aktivizimit të Bursës Energjetike Shqiptare, ALPEX, e cila padyshim do të garantojë transparencë, konkurrencë dhe përdorim efikas të kapaciteteve, sidomos sot më shumë se kurrë kur sektori privat po investon fuqishëm në kapacitetet fotovoltaike.” tha Balluku./Opinion.al
