Ka mbërritur në Beograd kryeministri Edi Rama, i cili do të takohet me Presidentin serb Aleksandër Vuçiç dhe zëvendëskryeministrin e Maqedonisë së Veriut, Nikola Dimitrov, në kuadër të nismës “Ballkani i Hapur”.
Dimitrov shkon në këtë takim duke zëvendësuar Zoran Zaev, i cili pasi humbi zgjedhjet lokale pak ditë më parë dha dorëheqjen nga posti i kryeministrit.
Takimet mes përfaqësuesve të tre shteteve priten të mbahen ditën e nesërme. Ky takim i paraprin një takimi tjetër me përfaqësues të kompanive nga Shqipëria, Serbia dhe Maqedonia e Veriut, dhe me përfaqësues të Këshillit Atlantik.
Pas bisedimeve do të vijojë një konferencë e përbashkët për shtyp e Ramës, Vuçiçit dhe Dimitrovit.
Paraprakisht, zëvendëskryeministri maqedonas, Dimitrov është pritur në aeroportin e Beogradit, “Nikola Tesla” nga ministrja serbe për Integrime Evropiane, Jadranka Joksimoviç.
Në një prononcim për Tanjug, Dimitrov tha se Maqedonia e Veriut, përkundër dorëheqjes së kryeministrit Zoran Zaev pas zgjedhjeve lokale, është plotësisht e përkushtuar ndaj iniciativës “Ballkani i Hapur”./Opinion.al
