Ish deputeti i Partisë Demorkratike, Klevis Balliu ka folur sot për mediat nga dyert e Gjykatës së Penale në lidhje me kallëzimin penal që Partia Demokratike ka bërë ndaj kryebashkiakut Veliaj në lidhje me pemët e rrugës Thuman-Kashar.
Balliu akuzoi prokurorinë për mos veprim në lidhje me këtë çështje dhe Veliajn i cili nuk është paraqitur për të dhënë llogari.
Sipas përfaqësuesit të PD, Bashkia e Tiranës ka bërë shkelje flagrante të ligjit sepse për dekorimin e aksit Thuman-Kashar ‘ka kontraktuar me kontratë direkte kompaninë Fusha shpk’. Këto lloj kontratash bëhen vetëm në raste emergjente dhe jo kur kemi të bëjmë me raste dekorimesh. Sipas Balliut ky projekt duhej të behej me procedurë tenderi, nga e cila do të përftohej një çmim më i ulët për kontratën. Ai shtoi gjithashtu se Bashkia e ka paguar kompaninë Fusha, 6500 euro për çdo pemë, që do të thotë se ka shpenzuar 2.6 milion euro në total për dekorimin e aksit rrugor.
Në bazë të kallëzimit penal të bërë pretendohet se ka shkelje flagrante të nenit 258 dhe 248 të kodit penal.
“Kjo aferë korruptive është nisur nga Erion Veliaj dhe Fusha SHPK për të vjedhur paratë e qytetarëve. Sot ata as nuk denjuan të vinin në këtë seanca gjyqëore. Gjyqi u shty. Kjo mazhorancë e sheh shtetit si pronë familjare ku nuk respektohen as Gjykata dhe as Prokuroria sepse i ka të tijat. Kemi shkelje flagrante të neneve 248 dhe 258 të kodit penal dhe nuk ka asnjë reagim. Veliaj duhet të vinte sot për të dhënë shpjegim për këtë aferë korruptive. Ashtu si në rastin e Ardit Gjoklajt ai po përpiqet t’i shpëtojë drejtësisë. Ai është hajduti më i madh dhe vetëm me pemë ka vjedhur miliona euro. Imagjinoni çfarë ka bërë me kullat. I bëj thirrje prokurorisë që të reagojë. Qytetarët nuk kanë bukë të hanë këta vjedhin miliona euro vetëm me pemë. Shumë shpejt prova të tjera do dalin për Veliajn”, shtoi Balliu. /Opinion.al
