Ish-deputeti i Partisë Demokratike, Klevis Balliu ka paralajmëruar sot në mbrëmje publikimin e disa materialeve që sipas tij tregojnë raste të shkeljes së ligjit me pronat.
“Sot në darkë do të shihni disa dokumente se kush janë hajdutët e pronave. Ne sot do të paraqesim disa prova ku do të faktojnë se cilët janë hajdutët e vërtetë të pronave”, deklaroi Balliu.
Balliu u paraqit sot në Prokurorinë e Tiranës ku ishte thirrur pas protestave tek Unaza e Re. Ai tha se projekti i ndërtimit të Unazës së Re është ‘fantazmë’ dhe gjithçka bëhet për ndërtimin e kullave. Balliu shtoi se ata që kanë dhunuar banorët do të shkojnë në burg dhe se dëmshpërblimi do të bëhet “cent për cent” kur PD të jetë në pushtet.
“Ata që kanë dhunuar banorët e unazës së re do të shkojnë në kokërr të burgut. Për sa i përket këtyre akuzave nuk më shqetësojnë aspak. Ajo që na shqetëson sot është që disa qytetarë aty mbetën pa shtëpi, dhe dhuna që u ushtrua mbi ta nga policia. Gjatë gjithë kohës qeveria ka gënjyer kur ka thënë se nuk preken pronat, faktet tregoi se preken të gjithë. Ky projekt është fantazmë, aty thjesht do të zgjerohet rruga dhe do të ndërtojnë kulla oligarkët. Policia ka hedhur gaz lotsjellës brenda banesave të tyre dhe i ka dhunuar” shtoi ai.
Pyetjes nëse i frikësohej një dënimi, ish-deputeti iu përgjigj se gjithçka mund të ndodhë pasi “nuk po na çon ligji nëpër gjykata, por Edi Rama.” /Opinion.al
