Një ditë para protestës së opozitës, ish-deputeti I Partisë Demokratike, Klevis Balliu ka deklaruar se kryeministri Rama është i vetmi njeri që kërkon marrëveshje në këto momente për të shpëtuar kokën e tij. Ai mohoi çdo mundësi që Partia Demokratike të ulet me të në bisedime për sa kohë ai është kryeministër.
“Ne nuk do bëjmë asnjë hap pas, kemi më shumë mbështetje që na jep forcë dhe energji të përballemi me strukturën kriminale të qeverisë. Ai (Rama) do marrëveshje për të shpëtuar kokën e tij. Por, nuk ka dhe nuk do të ketë marrëveshje me të sa kohë që ai do të jetë kryeministër” tha Balliu në një intervistë televizive.
Ai paralajmëroi se nëse ndërhyhet tek Unaza e Re atëherë do të ketë një përplasje të jashtëzakonshme. Sa për zgjidhjen e kësaj situate, Balliu propozoi që Rama të dëgjojë zërin e qytetarëve sa nuk është vonë.
“Tek protesta e Unazës bëhet fjalë për një aferë për të cilën askush nuk mbajti përgjegjësi, nëse ndërhyn Rama mund të këtë përplasje të jashtëzakonshme. Ka një mënyrë që kjo të mos ndodhë, që ai të dëgjojë zërin qytetar. Këtë duhet të bëjë edhe për raste të tjera, të dëgjojë vullnetin e popullit sa nuk është vonë”, u shpreh Balliu. /Opinion.al
