Kreu i grupit parlamentar të PS, Taulant Balla, në një dalje për mediat, këtë të enjte ka bërë me dije se do të ndryshojnë ligjin për Komisionet Hetimore dhe po ashtu sipas tij ndryshime duhen bërë edhe në Rregulloren e Kuvendit.
Në një prononcim për mediat pas mbledhjes së Konferencës së Kryetarëve ai e cilësoi si urgjente ndryshimet për Komisionet Hetimore.
“Në dhjetor të 2022, Kushtetuesja i dha të drejtë mazhorancës për një kërkesë tjetër të një komisioni hetimor. Kërkesat e opozitës janë të pakufijshme në të drejtën e tyre për t’i propozuar por kjo s’do të thotë që s’kemi të drejtë t’i shqyrtojmë. Kuvendi të adresojë në mënyrë urgjente dhe të menjëhershme të gjitha vendimet e Kushtetueses në 20 vitet e fundit të cilat nuk janë në ligjin për organizimin e Komisioneve Hetimore. Bëhet fjalë për një ligj të miratuar në 2002 ndaj të cilit ka një sërë vendimesh të gjykatës Kushtetuese që duhen marrë në konsideratë. Edhe Rregullorja e Kuvendit ka nevojë për ndryshime. Ligji flet për shqyrtim nga ana e Byrosë së Kuvendit që ka qenë paraardhësja e Konferencës së Kryetarëve. Në mënyrë urgjente do të kemi mundësinë të ndryshojmë ligjin për komisionet hetimore. Propozimi im ka qenë të kemi një komision për adresimin e ndryshimeve dhe të ecim me një detyrim që Kuvendi duhet të respektojë vendimet e gjykatës kushtetuese”, tha Balla.
Sa i përket zgjedhjes së avokatit të Popullit, Balla u shpreh se opozita e pati mundësinë që bëjë propozime dhe nuk e shfrytëzoi, ndërsa shtoi se tashmë do t’i jepet mundësia kujtdo që të shprehë interesin e tij.
“Opozita e pati kohën e nevojshme për t’i dhënë vendit një avokat populli dhe nuk e shfrytëzoi. Ne do të hapim garën. Do të jetë një proces i hapur dhe ka një traditë që opozita propozon avokatin, por jo e emëron atë. Emërimin e ka Kuvendi, duhet t’i sqarojmë gjërat. Gara duhet të jetë e hapur dhe ftoj avokatët, apo personat që përmbushin kriteret të vijnë të kandidojën dhe pastaj i bëj thirrje opozitës të negociojë për të rënë dakord”, tha Balla.
