Ministri i Brendshëm Taulant Balla ka vizituar sot në spital efektivin e policisë i cili mbeti i plagosur në Himarë, pasi ndërhyri për të shuar një konflikt mes disa personave.
Balla tha se autori duhet të marrë një dënim ekzemplar pasi kushdo që ngre dorën mbi efektivët e policisë ka ngritur dorën ndaj shtetit.
Nga spitali i Vlorës, ai deklaroi se efektivi Redin Çaushaj ndodhet tashmë jashtë rrezikut për jetën.
“Mbrëmë pak para mesnatës jam informuar për këtë ngjarje të rëndë, ku në fakt oficeri ynë ka qenë jashtë shërbimi, por i ndodhur pranë një ngjarjeje dhe një konflikti ka ndërhyrë me qëllimin për të shuar konfliktin. Në zhvillim e sipër të këtij konflikti një nga personat ka goditur me armë të ftohtë punonjësin e policisë, duke i shkaktuar dëmtim të rëndë, që mund të çonte deri në humbjen e jetës. Gjej rastin të falënderoj stafin e spitalit të Vlorës. Efektivi është nën kujdes intensiv. Jemi më të qetë pasi është jashtë rrezikut për jetën.
Duhet të jetë e prerë kushdo që do të ngrejë dorë kundër një punonjësi policie të mos i bindet urdhrit të një punonjësi policie, reagimi ynë do të jetë shumë i fortë. I kërkoj publikisht që ky rast të hetohet publikisht ndaj personit që tentoi të godasë punonjësin e policisë të ketë një dënim ekzemplar. Kushdo që godet një punonjës policie ka goditur shtetin”, deklaroi Balla.
Efektivi 25-vjeçar ishte jashtë shërbimit, por ndërhyri për të parandaluar një konflikt dhe u plagos nga Thodhori Mërkuri i cili u arrestua nga policia. Ai e ka kaluar rrezikun për jetën pasi iu nënshtrua një operacioni që zgjati për disa orë që nga ora 1 e mëngjesit deri në oren 8 pas goditjes me thikë që mori në qafë./Opinion.al
