Gjatë mbledhjes së sotme të Grupit parlamentar të PS, kreu i këtij grupi Taulant Balla, teksa socialistët do të hidhnin në kuti zarfin me tre emra për Presidentin e ri, tregoi kriteret për zgjedhjen e kreut të shtetit.
Balla theksoi se kandidati ose kandidatja për President duhet që të jetë mbi moshën 40-vjeç, si edhe 10 vitet e fundit të ketë jetuar në Shqipëri.
Por duket se ky kriter ka habitur deputetin e Partisë Socialiste, Lavdrim Krashi, i cili u kthye nga Britania e Madhe për të marrë pjesë në zgjedhjet e 25 prillit ku edhe fitoi mandatin e deputetit. Teksa Balla fliste ai është filmuar duke vënë duart në kokë.
Balla më pas sqaroi deputetin se ky element, që përjashton emigrantët shqiptarë, është i përcaktuar në Kushtetutë dhe është një model që gjendet thuajse në të gjitha Kushtetutat e ngjashme të republikave parlamentareve.
“Duhet t’i kujtoj që Kushtetuta ka përcaktuar si kriter bazë të kandidatit ose kandidates për President moshën, 40-vjeç e lart dhe 10 vitet e fundit duhet të jetë rezident në Shqipëri. Ky është një kriter që kur është shkruar Kushtetuta në vitin ’98, ndoshta nuk ka pasur parasysh këtë lëvizje kaq të madhe, që përjashton një pjesë të konsiderueshme të atyre shqiptarëve që jetojnë jashtë territorit. Se shoh Lavdrim Krashin që nuk bie dakord me këtë element kushtetues. Por nuk është një shpikje shqiptare i dashur Lavdrim, por është një model që gjendet thuajse në të gjitha Kushtetutat e ngjashme të republikave parlamentareve. Na vjen keq nuk mund të kemi një shqiptar/e që jeton jashtë territorit se duhet të përmbushë këtë kriter”, tha Balla.
Deputeti Lavdrim Krashi nga Dibra, emigrant prej vitesh në Britaninë e Madhe, pranoi ftesën e PS për të qenë kandidat për deputet në zgjedhjet e 25 prillit dhe tashmë është deputet i PS në Kuvendin e Shqipërisë.
