Tifozi i njohur si “fytyra me shqiponjë”, Besmir Limani do të pajiset së fundmi me pasaportë të Shqipërisë.
Këtë lajm e ka bërë të ditur ministri i Brendshëm Taulant Balla përmes një postimi në rrjetet sociale, krahas së cilit shkruan se ishte kënaqësi të mirëpriste sot tifozin-shqiponjë Besmir Limani, i cili e ka shoqëruar kombëtaren kuq e zi kudo.
“Kënaqësi të mirëpres sot tifozin-shqiponjë Besmir Limani, i cili e ka shoqëruar kombëtaren tonë kuq e zi kudo. Besmiri i cili jeton prej shumë vitesh në Zvicër, depozitoi edhe kërkesën për tu pajisur me pashaportë shqiptare”, shkruan Balla.
Ministri Balla tha me këtë rast se “duhet ta mbështesim ekipin kombëtar, dhe meqë ti je ndër tifozët më të zjarrtë e më prezentë, besoj që duhet t’u bëjmë një thirrje tifozëve që të sillen realisht si “lojtar i 12”.
Nuk duhet të bëjnë asnjë dëm, qoftë hedhje të flakadanëve dhe gjithçka tjetër në fushë, sepse na dëmton për ndeshjen e fundit në grup me Ishujt Faroe. Pra duhet që kësaj radhe, gjithçka të shkojë fjollë!”
Ndërkohë nga ana tjetër vetë Besmiri ka publikuar takimin me Ballën në rrjetet e tij sociale, ku shkruan se:
“I nderuari Ministër. Të faleminderit publikisht për realizimin e ëndrrës për pajisjen me pasaportë shqiptare. Në Gjermani Euro 2024, unë Besmir Limani “Fytyra me shqiponjë” udhëtoj edhe me dokument Kuq e Zi! I Juaji B.Limani.”
Balla i premtoi shtetasit shqiptar me banim në Zvicrës, se kërkesa e tij për shtetësi dhe pasaportë shqiptare do të shqyrtohet në bazë të parashikimeve ligjore, duke i dhënë edhe prioritetin e duhur në këtë rast, sipas kushteve të programeve të veçanta të shtetësisë./Opinion.al
