Pas 30 qershorit një numër diplomatësh ndërkombëtarë thanë se pas zgjedhjeve vendore, Gjykata Kushtetuese do të bëhet funksionale dhe do të jetë ajo që do të vendosë për ligjshmërinë e tyre. Në deklaratën e zotit Palmer dhe atë të ambasadës Gjermane u përmend fakti se zgjedhjet mund të përsëriten nëse kjo gjë do të vendoset nga Gjykata Kushtetuese.
Sot në fjalën e tij në Kuvend, kryetari i grupit parlamentar të Partisë Socialiste, Taulant Balla theksoi se kandidatët fitues të zgjedhjeve të 30 qershorit do të qeverisin të gjitha bashkitë e vendit për 4 vitet e ardhshme.
“Shqiptarët zgjodhën më 30 qershor të votojnë të qetë duke shprehur me votë vullnetin e tyre dhe kush do të qeverisë bashkitë e tyre, të jeni të sigurt, në katër, shikoje mirë Ilir, Sali, Monik edhe Lulzim, në katër vitet e ardhshme” tha Taulant Balla
Përsa i përket deklaratave të presidentit Meta, Balla ritheksoi se ai duhet të lirojë zyrën dhe se mandatet e Partisë Socialiste janë krejtësisht legjitime bazuar në votat e marra në 30 qershor.
“Ajo zyrë duhet liruar urgjentisht për të vendosur autoritetin e Presidentit, një figurë që duhet ta bashkojë Shqipërinë. Zgjedhjet e 30 Qershorit tregun se dhuna ndaj institucioneve ishte e drejtuar nga opozita e dhunës. Opozita e re meriton respekt dhe dorën e shtrirë për bashkëpunim. PS-ja ka marrë të njëjtën votë që ka marrë në 2017, ekzaktësisht, rikonfirmon se mandati i këtij kuvendi është legjitim“ shtoi Balla nga Kuvendi. /Opinion.al
