Kreu i grupit parlamentar të PS-së, Taulant Balla gjatë fjalës së tij në Kuvend tha se, PS do të fitojë dhe zgjedhjet e vitit 2021, ndërsa opozita protestonte.
“Në do fitojmë edhe në vitin 2021 sepse u kemi dëshmuar shqiptarëve se jemi besnik ndaj tyre. Në zgjedhjet lokale në 30 Qershor do fitojmë, kush mendon se nuk do të zhvillohen, e ka gabim. Do të zgjidhen 61 kandidatët. Ne jemi modeli më i mirë dhe kemi model të suksesshëm në çdo cep të vendit. Ne jemi këtu sot për të plotësuar këtë mandat të rëndësishëm”, tha Balla.
Numri dy i PS-së, u shpreh se me protestën e 16 shkurtit PD u rikujtoi shqiptarëve se me të rikthehen huliganët.
“16 shkurti referendum që shkatërroi PD. U rikujtoi shqiptarëve se me PD rikthehen huliganët, kthim pas në kaos. Lulzim Basha krijoi precedent të rrezikshëm, çdo opozitë të kërcënojë me dorëzim mandatesh nëse nuk i jepet pushteti në tavolinë. Harroje Lulzim, pushteti veç fitohet me votë. Nuk është faji i shqiptarëve se t’i nuk votohesh. Kush ka dyshimin se me 30 qershor nuk do të zhvillohen zgjedhjet e ka gabim”, tha Balla. / Opinion.al
