Nga Parlamenti, ku janë zhvilluar debate për reformën zgjedhore, Taulant Balla foli edhe për krijimin e partisë së re, Bindja Demokratike. Balla hodhi poshtë zërat se Astrit Patozi po mbështetet nga mazhoranca, duke thënë se Patozi ka qenë tetë vite në pushtet dhe mund ta ndryshonte sistemin e partitokracisë.
“Astrit Patozi flet për partitokracinë. Astrit Patozi ka qenë nënkryetar i Partisë Demokratike tetë vite në pushtet. I ka pasur gjithmonë mundësitë për ta ndryshuar sistemin, thojini partisë mëmë që Astrit Patozi është i tyre, jo i joni. Ç’është kjo punë, si mund të mbështesim ne kundërshtarin tonë? Ku e dimë ne që nuk është lojë e Sali Berishës?”, u shpreh Balla.
Ai më tej dha një mesazh të qartë për opozitën, në lidhje me pengimin e zgjedhjeve të 30 qershorit.
“Ne të dënojmë çdokënd që fut duart në zgjedhje. Zgjedhjet e 30 qershorit do të zhvillohen, Kodi Penal dënon pengimin e zgjedhjeve, fillon me 5 vite burg për këdo që pengon çdo qytetar shqiptar të ushtrojë vullnetin e vet”, ka thënë Taulant Balla nga foltorja e Kuvendit./Opinion.al
