Deputeti socialist, Taulant Balla deklaron se të paktën në Qarkun e Elbasanit, rolin e opozitës po e kryen Lëvizja Socialiste për Integrim.
Ai tha se Monika Kryemadhi, e caktuar për drejtimin e fushatës së LSI-së në këtë qark, është duke u bërë opozitë punës së dikastereve që drejton partia e saj.
Balla solli si shembull, sipas tij, një deklaratë të Kryemadhit në takim me fermerët në fshatin Shushicë.
“Mos ja qani hallin opozitës, të paktën në Elbasan, sepse e ka nisur fushatën. Nuk e di çdo të bëjë në qarqet e tjera, por Monika bën opozitë për dikasteret që janë përgjegjësi e partisë së saj. Monika Kryemadhi shkoi në Shushicë dhe u tha fermerëve që për bujqësinë nuk është bërë gjë, ndërkohë që Ministrinë e Bujqësisë dhe Agjencinë e Pagesave të Fermerëve e ka vetë LSI-ja”, u shpreh ai.
Deputetja e LSI-së, Monika Kryemadhi, dje, ka folur hapur gjatë një takimi me banorët e Rrajcës në Librazhd.
Kryemadhi u shpreh se në shumë zona të vendit, ashtu si në Rrajcë, nuk ka kushte minimale për banorët siç janë uji dhe rrugët, ndërkohë që politika nuk merret me këto çështje konkrete, por flet vetëm për debate dhe pseudo-reforma.
