Kryetari i grupit parlamentar të Partisë Socialiste, Taulant Balla, pjesë e delegacionit të kryeministrit Edi Rama në vizitën dyditore në Berlin; është shprehur se deklarata e deputetit Gunther Krischbaum është nxitur nga kreu i opozitës, Lulzim Basha.
Balla thekson se Krischbaum beson më shumë përrallat e Lulzim Bashës, se sa Raportin e Progresit të Komisionit Evropian.
“Për këtë ne nuk mund t’i vëmë asnjë faj deputetit gjerman, përderisa shejtanin në barkun e tij e kanë futur kolegët tanë opozitarë nën drejtimin e Lulzim Bashës. I cili, ndryshe nga çfarë ka propaganduar këtu kur ndodhi ajo që nuk donte, pra rekomandimi pozitiv, atje ka lënë kokrrën e namit me të zezat që ka thënë për Shqipërinë”,- deklaron ai.
Mirëpo, sipas tij, në Bundestagun gjerman ka një mbështetje të fortë për zgjerimin e BE-së me vendet e Ballkanit Perëndimor, si dhe për vijimin e procesit me Shqipërinë.
Përmes një shënimi në Facebook, Balla shkruan se në një prej parlamenteve më serioze të Europës, respektohen procedurat dhe u jepet kohë të gjithëve për të marrë pjesë në një debat të rëndësishëm.
Ai deklaron se Shqipëria, as nuk ka pritur ditën e djeshme dhe as pret që Bundestagu gjerman të thotë PO-në e shumëpritur pa ezauruar fazat e procesit vendim-marrës.
Sipas tij, ka edhe deputetë që janë kundër, ndër 698 anëtarët e Bundestagut. Deputeti i PS-së, merr për shembull, edhe rastin e deputetëve të AFD-së, të cilët janë kundër BE-së në tërësi.
“Një zë kundër, i vetëm deri tani, brenda CDU-së është edhe deputeti Gunther Krischbaum, i cili e priti me shumë respekt kryeministrin dhe delegacionin shqiptar dhe e drejtoi seancën me gjithë korrektesën që e karakterizon Bundestagun”,- shkruan Balla në Facebook.
