Është zbardhur dëshmia e 22-vjeçarit që u arrestua ditën e djeshme për vrasjen e biznesmenit Rakip Roli. Mësohet se Llej Lika e ka pranuar fajin dhe autorësinë e krimit.
Në dëshminë e zbardhur, ai shprehet se arsyeja e vrasjes së Rakip Rolit ka qenë sherri që djemtë e Rolit kanë pasur me të para katër muajsh.
Gjatë konfliktit të atëhershëm, Lika thotë se ata kanë ushtruar dhunë fizike ndaj tij.
Më tej, ai ka mohuar akuzën se babai dhe kushëriri i tij të kenë lidhje me ngjarjen e dy ditëve më parë, shkruan tch.
Skënder dhe Llej Lika u arrestuan një ditë më parë në zonën e Fushë Milotit, si autorët e dyshuar të vrasjes të biznesmenit Rakip Roli.
Si ndodhi ngjarja?
Rakip Roli, i njohur më së shumti si Pilot Roli ishte një biznesmen materialesh ndërtimi në zonën e Sanxhakut. Ai u ekzekutua me armë zjarri këtë të premte (10 dhjetor 2021) në një atentat të organizuar vetëm pak metra larg banesës së tij në një fshat të Kurbinit.
Ngjarja e rëndë ndodhi në ora 08:45 në rrugën kryesore të fshatit Sanxhak, në dalje të qytetit të Laçit. Ai është qëlluar disa herë me armë zjarri që dyshohet të jetë automatik dhe si pasojë e plagëve të marra ka ndërruar jetë në vend.
I ndjeri po udhëtonte me automjetin e tij tip “Audi” ku dy persona i kanë ndërprerë rrugën dhe e kanë qëlluar me breshëri automatiku, ndërsa makina ka devijuar në kanalin kullues anash rrugës.
