Procesi gjyqësor për çështjen ‘Babale’ është shtyrë për në 11 qershor nga Gjykata Penale e Tiranës.
Pjesë e këtij procesi janë ish deputeti i Partisë Demokratike Ervin Salianji, gazetari Jetmir Olldashi dhe Fredi Alizoti, të cilët akuzohen për kallëzim të rremë lidhur me të ashtuquajturën dosja ‘Babale’.
Arsyeja e shtyrjes së seancës ka qenë pasi tre të akuzuarit nuk janë njoftuar për seancën e 30 majit, ashtu siç e parashikon ligji. Oficerët e policisë gjyqësore i kishin njoftuar me celularë të pandehurit por jo me fletëthirrje.
Në këtë seancë ishte parashikuar që Gjyqtari Artan Gjermeni të vendoste nëse do të pranonte kërkesën për gjykim të shkurtuar të Fredi Alizotit, i cili dyshohet se ka imituar zërin e Agron Xhafajt në audio përgjimet e publikuara nga Partia Demokratike.
Albert Veliu, ose ndryshe ‘Babalja’ aktualisht ndodhet në Belgjikë, ku ka përfituar edhe azil politik. /Opinion.al
