Deputeti i Partisë Socialiste dhe ish-ministri i Brendshëm, Fatmir Xhafaj ka folur për herë të parë pas vendimit të Gjykatës së Apelit për dënimin e Ervin Salianjit me 1 vit burg për dosjen “Babale”.
I ftuar në emision ‘Opinion’ në TV Klan, Xhafaj dha arsyen e dënimit të deputetit demokrat.
Sipas Xhafës, Salianji është dënuar sepse ka prodhuar prova të rreme, për iniciuar një proces penal për vëllain e tij në mënyrë për të goditur figururën politike të ish-ministrit të brendshëm.
A keni ju influencues, insistues apo njeriu që keni lëvizur fijet për të futur në burg Ervin Salianjin?
Fatmir Xhafaj: Së pari më lejoni të them që kjo është hera e parë që flas pas 6 vitesh në një emision televizive. Është hera e parë që flas për këtë gjë. E rëndësishme për mua në këtë proces ka qenë e vërteta. Kam pritur 6 vjet që të zbardhet e vërteta jo sipas meje, por sipas drejtësisë. Kam pritur me qetësi të dyja shkallët e gjykimit dhe që drejtësia të bënte punën e vet.
Drejtësi e influencuar apo e painfluencuar?
Fatmir Xhafaj: Unë nuk do të doja të shihja një politikan në burg për kallëzim të rremë. Por nga ana tjetër qëndron fakti që ka ndodhur, që është shumë e rëndë, më shumë se dënimi i një personi. Për efekt të dramës njerëzore që ka krijuar, por edhe modelit, shembullit dhe efektit që ka në politike dhe shoqëri.
Sa drama politike mund të ketë patur në Shqipëri? Pse duhet të ketë dy standarde?
Fatmir Xhafaj: Nuk ka dy standarde. Ky është një shembull i mirë që kur krijon prova të rreme, me qëllim që të filloj një ndjekje penale, me qëllim për të akuzuar dikë duhet të përgjigjesh me kallëzim të rremë. Ka 6 vjet që çfarë nuk dëgjoj për këtë histori, kam të drejtë morale, në emër të familjes sime, mbi të cilës janë hedhur baltë dhe janë vrarë shpirtërisht për fakte të pavërteta.
Dua të bëj një sqarim me interes për publikun. Ervin Salianji nuk është dënuar sepse tha publikisht se vëllai im ka patur një dënim penal, as sepse tha se vëllai nuk është duke e vuajtur atë moment. Por është dënuar se me qëllim ka prodhuar prova të rreme, për iniciuar një proces penal për vëllain tim me synimin për të më goditur mua si politikan dhe si ministër i brendshëm në atë kohë.
