24 vjeçarja Marsela Toshi është kthyer mbrëmë nga Greqia pasi ka marrë vesh ngjarjen makabre, ku bashkëshorti i saj Naum Toshi vrau dy fëmijët e saj 4 dhe 7 vjeç dhe më pas vrau edhe veten. Marsela ka hyrë në orën 23:00 në pikën kufitare të Kapshticës dhe është shoqëruar në Drejtorinë e Policisë së Korçës.
Ajo është marrë në pyetje përreth dy orë nga oficerët e policisë gjyqësore të Krimeve të Rënda. Burimet për Opinion.al thanë se Marsela ka rrëfyer variantin e saj për konfliktet familjare. Ajo është larguar nga banesa, në drejtim të Greqisë më 17 Nëntor dhe ishte kthyer të dielën më 4 Dhjetor. Marsela u ka thënë oficerëve gjyqësore se ka debatuar me bashkëshortin për kujdestarinë e fëmijëve. “Doja ti merrja me vete në Greqi, por Naumi më tha ik puno, na sill para të ushqehemi”, citohet të ketë thënë nëna e dy fëmijëve në polici.
“Debatuam me fjalë të ashpra”, ka thënë më tej ajo, “por burri nuk më ka dhunuar”. Më tej ajo ka treguar se po atë natë (mbrëmjen e së dielës) është kthyer për Greqi. Sipas saj, qëllimi ishte të punonte në Greqi dhe jo të braktiste familjen.
Pas marrjes në pyetje ajo është lënë e lirë. Marsela Toshi do të ndiqet penalisht në gjendje të lirë për braktisje të fëmijëve, thanë burimet nga policia e Korçës. /Opinion.al
