Detaje të reja kanë dalë nga ngjarja e rëndë, e ndodhur në fshatin Zvezdë të Maliqit, ku babai vrau me çekiç të birin.
Mësohet se viktima ishte i divorcuar nga bashkëshortja, më parë jetonte në Gjermani dhe kishte dy vite që ishte kthyer në Shqipëri.
Për shkak të divorcit, konsumonte alkool çdo ditë, ndërsa ditën e djeshme është konfliktuar me babain duke tentuar ta shtyjë në pus. Ky i fundit i është kthyer duke e goditur me çekiç.
Fillimisht familjarët kanë deklaruar se viktima, duke qenë në gjendje të dehur, ishte rrëzuar aksidentalisht në banesën e tij dhe për pasojë kishte marrë dëmtime në kokë. Mirëpo, pas hetimeve është zbuluar gjithë ngjarja.
Shefki Bylykbashi 77-vjeç e ka goditur të birin disa herë në kokë me çekiç që përdoret për të thyer gurë, dhe si pasojë e plagëve të marra, 50-vjeçari ka humbur jetën gjatë transportimit për në spitalin e Korçës.
