Një 50-vjeçar ka humbur jetën në Korçë mbrëmjen e së premtes, pasi është goditur disa herë me çekiç në kokë nga i ati.
Ngjarja fillimisht u raportua si vdekje aksidentale, pasi dyshohej se 50-vjeçari Hamdi Bylykbashi, nga fshati Zvezdë ishte rrëzuar në banesën e tij teksa ishte në gjendje të dehur, sipas deklarimeve të familjarëve.
Por pas hetimeve të thelluara ka rezultuar se 50-vjeçari duke qenë në gjendje të dehur, është konfliktuar në banesë me babanë Shefki Bylykbashi Sh. B., 77 vjeç, të cilin ka dashur ta hedhë në pusin e ujit në oborr.
Ky i fundit ka reaguar duke e goditur disa herë në kokë me mjete të forta (çekiç që përdoret për të thyer gurë). Si pasojë e plagëve të marra 50-vjeçari ka humbur jetën gjatë transportimit për në spitalin e Korçës.
“Pas hetimeve të thelluara të kryera nga grupi hetimor i përbërë nga specialistët për Hetimin e Krimeve të Komisariatin e Policisë Maliq dhe specialistët e Seksionit për Hetimin e Krimeve të Rënda të DVP Korçë, nën drejtimin e Prokurorisë së Rrethit Gjyqësor Korçë, u bë e mundur zbardhja e plotë e rrethanave të kësaj ngjarjeje.
Nga hetimet e thelluara dhe provat e siguruara rezultoi se pasditen e djeshme, 50-vjeçari duke qenë në gjendje të dehur, është konfliktuar në banesë me babain Sh. B., 77 vjeç, të cilin ka dashur t’a hedhë në pusin e ujit në oborr.
Më pas 77-vjeçari, e ka goditur disa herë në kokë me mjete të forta (çekiç që përdoret për të thyer gurë), ku si pasojë e dëmtimit të rëndë, 50-vjeçari ka humbur jetën gjatë transportimit për në spitalin e Korçës”.
Në vijim të veprimeve procedurale, u bë arrestimi në flagrancë i shtetasit Sh. B., 77 vjeç, për veprën penale “Vrasja për shkak të marrëdhënieve familjare” -njofton policia.
Materialet i kaluan Prokurorisë pranë Gjykatës së Rrethit Gjyqësor Korçë, për veprime të mëtejshme./Opinion.al
