Kryeministri Edi Rama ka dalë vetë sot para kamerave për të njoftuar se për festat e fundvitit do të marrin shpërblim pensionistët, familjet me ndihmë ekonomike dhe personat me aftësi të kufizuara. Përkatësisht 60 mijë lekë (të vjetra) për pensionistët dhe 20 mijë lekë (të vjetra) për personat me aftësi të kufizuara dhe familjet me ndihmë ekonomike. Në thesin e dhuratave Kryeministri u përpoq të fuste edhe detyrimet që ka Qeveria për familjet e përmbytura si dhe për fermerët që patën dëme nga prekja e gjedheve nga dermatoza nokulare. Në fakt si dëmshpërblimi i të përmbyturve ashtu dhe kompensimi i fermerëve nuk janë shpërblime me rastin e festave por thjesht përkojnë me datat festive.
Gjithsesi, duke qenë se ata janë mbajtur me gënjeshtra deri më sot, deklarata e Ramës se fondi për këto kategori është miratuar, mbetet një lajm i mirë. Ndryshe ndodh për mijëra punonjës të administratës, si mësues, mjek, polic, e shumë të tjerë, që këtë vit nuk marrin asnjë lek shpërblim. Vite më para administrata merrte pagën e 13-të, më pas u hoq dhe u caktua një shpërblim prej 100 mijë lekësh (të vjetra). Por për këto festa, qeveria duket se nuk ka fonde, ndaj gjatë konferencës për shtyp, Kryeministri nuk i zuri fare me gojë punonjësit e shtetit./ Opinion.al
