Të paktën 35 persona janë vrarë pasi një treg i mbushur me njerëz në kryeqytetin e Sudanit u godit me “armë shpërthyese”, thotë një organizatë bamirëse mjekësore.
Médecins Sans Frontières (MSF) e përshkroi atë si “kërdi”, duke thënë se më shumë se 60 njerëz ishin plagosur gjithashtu në sulm. Banorët vendas thonë se një avion ushtarak bombardoi tregun Qouro në Khartoum jugor të dielën. Fraksionet ushtarake rivale kanë luftuar që nga muaji prill. Të dielën, koordinatorja e urgjencës e MSF, Marie Burton tha se Khartoum “ka qenë në luftë për gati gjashtë muaj. Por megjithatë, vullnetarët dhe personeli mjekësor në spitalin Bashair janë të tronditur dhe të mbingarkuar nga shkalla e tmerrit që goditi qytetin” të dielën, shtoi ajo në X, dikur Twitter.
MSF tha se “armët shpërthyese” kishin goditur tregun dhe se sulmet ajrore dhe granatimet vazhduan në “një ditë tjetër vuajtjeje dhe humbje jete të paimagjinueshme”.
“Ne po përpiqemi të shpëtojmë jetën e njerëzve, pjesët e trupit të të cilëve u janë këputur nga shpërthimi. Ishte një masakër,” shtoi MSF.
Sudani u zhyt në një luftë civile në prill pasi shefi i ushtrisë Gjeneral Abdel Fattah al-Burhan dhe komandanti i Forcave Paraushtarake të Mbështetjes së Shpejtë (RSF) Gjenerali Mohamed Hamdan Dagalo u ndanë.
Rreth pesë milionë njerëz janë detyruar të largohen nga shtëpitë e tyre dhe mijëra janë vrarë. Khartoum dhe rajoni perëndimor i Darfurit janë goditur më keq nga konflikti. RSF kontrollon pjesën më të madhe të Khartoum dhe qytetet fqinje të Omdurman dhe Bahri. Ushtria ka kryer vazhdimisht sulme ajrore në një përpjekje për të rimarrë kontrollin e qyteteve.
Një sulm ajror vrau të paktën 20 njerëz, duke përfshirë dy fëmijë, rreth një javë më parë, thanë aktivistët. SHBA, Arabia Saudite dhe vende të tjera janë përpjekur të ndërmjetësojnë për t’i dhënë fund konfliktit, pa sukses. Janë shpallur disa armëpushim për të lejuar njerëzit të shpëtojnë nga luftimet, por ato janë thyer./Opinion.al
