Pas njoftimeve në mediat online dhe deklaratës në Parlament të deputetit të PD Asllan Dogjani se një avion i vogël i dyshimtë fluturoi mbi Gjirin e Lalzit, ka reaguar Policia e Durrësit.
Blutë e qytetit bregdetar konfirmojnë fluturimin e këtij avioni dhe thonë se e kanë ndjekur përgjatë gjithë itinerarit të tij, por nuk është ulur në asnjë zonë që mund të kishte pistë të modifikuar.
Sipas Policisë së Durrësit, avioni kishte marrë leje nga Autoriteti Civil për fluturim në orën 16:00-17:00 nga aeroporti i Rinasit në Gjirin e Lalzit pa asnjë ndalesë.
Njoftimi i policisë
Më datë 13.10.216, rreth orës 16:00-17:00, Shërbimet e Rendit, në zonën e Gjirit të Lalëzit kanë konstatuar duke fluturuar një avion të vogël, tip sportiv.
Drejtuesi i avionit ka bërë një fluturim në këtë zonë dhe më pas është kthyer në drejtim të Rinasit.
Pas verifikimeve të kryera është konkluduar se avioni i përkiste shoqërisë ajrore private “Viva Air” dhe ka pasur leje fluturimi në këtë hapësirë nga qendra e Kontrollit Ajror Civil Rinas.
Sqarojmë që avioni nuk është ulur për asnjë moment në hapësirën tokësore dhe destiancioni i fluturimit ka qenë Rinas-Gjiri i Lalëzit- Rinas.
