Prokuroria kërkon 15 vjet burg për pilotin italian, Giorgio Riformato, avioni i të cilit ngeci në rërën e Divjakës dhe me këtë mjet fluturues ai akuzohet se do të trafikonte drogë drejt Italisë.
I pandehuri Riformato ka deklaruar para pesëshes gjykuese se qëllimi i ardhjes së tij në Shqipëri lidhej me turizmin.
“Vendosa të udhëtoja në vendin tuaj për të parë mundësinë e një investimi të mundshëm për hapjen e një agjencie turistike, pasi për vizitën e Papës kishte shumë italianë që do të udhëtonin drejt Shqipërisë”, – u shpreh Riformato.
Më tej ai theksoi se, nuk ka qenë një ditë përpara fluturimit në Divjakë. Madje, tha se konform të gjitha rregullave ka marrë leje për të bërë një fluturim turistik, dhe për shkak se avioni i tij pësoi një defekt teknik u detyrua të ulej në plazhin e Divjakës.
“Më 10 maj po fluturoja mbi bregdetin shqiptar kur pësova një defekt teknik për shkak të një turbulence. Menjëherë lëshova alarmin SOS, alarm të cilin kulla ajrore e Brindisit e ka kapur dhe ajo e Rinasit jo”, – tha Riformato.
Piloti italian u arrestua në Divjakë në maj 2014, pasi sipas prokurorisë, do të bënte trafik droge nga Shqipëria drejt Italisë. Në pranga ra dhe Saimir Bajrami, i cili dëshmoi më vonë, se drogën që iu gjet në makinë e kishte siguruar nga një person në zonën e FushëKrujës dhe se ajo do të trafikohej me avion të vogël drejt Italisë. Bajrami dhe të pandehurit e tjerë po gjykohen në një proces me gjykim të shkurtuar, pasi kanë pranuar akuzën. Ndërsa, Riformato mohon përfshirjen në rrjetin e trafikut.
