Rreth 15 persona u vranë të hënën kur aeroplanët luftarakë rusë dhe sirianë goditën disa zona në provincën Idlib të Sirisë.
Vëzhguesi Sirian i të Drejtave të Njeriut, me seli në Londër u shpreh se 13 persona janë vrarë nga sulmet në një treg në qytezën Maret al-Nouman të Idlibit, provincë që kufizohet me Turqinë dhe kontrollohet në masë të madhe nga forcat opozitare.
Vëzhguesi tha se edhe dy civilë të tjerë janë vrarë, njëri në Sarakeb dhe tjetri në al-Saraman.
Udhëheqësi i Vëzhguesit, Rami Abdel Rahman, tha se avionët rusë kanë goditur edhe zona të tjera në jug të Idlibit.
Rusia i ka ofruar mbështetje të madhe qeverisë së presidentit sirian, Bashar al-Assad, gjatë luftës civile në këtë vend, e cila ka nisur qysh në vitin 2011.
Sipas Vëzhguesit, rreth 4,775 njerëz janë vrarë në mesin e tyre 1,224 civilë qëkur forcat e Qeverisë siriane kanë nisur një ofensivë masive në muajin prill, kundër rebelëve në provincat Hama dhe Idlib.
