Dy nga tre avionët e vëzhgimit të NATO-s të dislokuar përkohësisht në Rumani kanë mbërritur në një bazë ajrore pranë Bukureshtit, nga ku do të fluturojnë me misione për të monitoruar aktivitetin ushtarak rus pranë kufijve të aleancës ushtarake të përbërë prej 30 vendesh.
Avionët e Sistemit të Paralajmërimit dhe Kontrollit Ajror u ulën në bazën ajrore Otopeni të martën pasdite, me një tjetër që pritet të mbërrijë më vonë, raporton AP News. Ata do të vendosen atje për disa javë.
Avioni AWACS, të cilit NATO i referohet si “sytë në qiell” i përket një flote me bazë në Gjermaninë perëndimore.
Avionët kanë kupola të mëdha radarësh të montuara në trup dhe mund të zbulojnë aeroplanët qindra kilometra larg.
Ambasadori i Gjermanisë në Rumani, Peer Gebauer, tha në aeroport pas uljes së avionit të parë se vendosja “nënvizon vendosmërinë tonë për të qëndruar të fortë në këtë kohë krize”.
“Ky mision vëzhgimi AWACS, i cili do të fillojë sot në Rumani, është një tjetër dëshmi e vendosmërisë sonë – të angazhimit tonë për të mbrojtur çdo centimetër të territorit aleat,” tha ai.
