Europa mbetet aktualisht kontinenti më i prekur nga COVID-19, ndonëse shifrat janë rritur ndjeshëm edhe në Shtetet e Bashkuara të Amerikës.
Italia dhe Spanja, dy vendet më goditura nga koronavirusi kanë kërkuar së fundi me insistim ndihmën dhe ndërhyrjen e Bashkimit Europian, si një domosdoshmëri për daljen nga kriza.
Ndërkohë, së fundi Gjermania, ka ndërhyrë duke ofruar suport mjekësor kryesisht për trajtimin e disa pacientëve italianë dhe francezë në spitalet gjermanë.
Avionë ushtarakë gjermanë janë ulur në Bergamo mëngjesin e djeshëm dhe kanë marrë për trajtim 6 pacientë të cilët do të trajtohen në spitalet e Gjermanisë. Sikurse shihet nga fotot e publikuara bëhet fjalë për avionë mjeksor Airbus A-310 ‘Medivac’, që ofrojnë shërbim edhe gjatë transportit.
Ndërkohë në Francë, trenat e shpejtësisë së lartë po përdoren si spitale, me shtretërit që janë përgatitur për pacientët e Covid-19 në disa nga zonat më të goditura të vendit.
“Ne kemi këtu shumë më tepër hapësirë sesa në një ambulancë ose një helikopter”, tha François Braun, president i shërbimit të urgjencës “Samu”.
Çdo vagon ka një ekip mjekësor, duke përfshirë një mjek të kujdesit intensiv, një anestezist dhe tre infermierë.
Në total, rreth 50 persona, përfshirë kujdestarët dhe stafin ndihmës, janë në bord gjatë transportit.
“Rajoni lindor është në kulmin e valës së tij, të cilin me siguri do ta përjetojmë në rajonet e tjera në javët e ardhshme”, shpjegon Lionel Lamhaut, mjeku përgjegjës për transportimin e pacientëve.
“Ideja është që të punohet me kalimin e pacientëve nga rajonet që janë në kulmin e plotë të epidemisë, për t’i transportuar ata drejt rajoneve aktualisht më të qetë, dhe më pas këto rotacione mund të ndodhin në të gjithë vendin apo edhe në Evropë”, shtoi Lamhaut.
Për disa javë, spitalet në Francën lindore kanë patur një fluks te madh pacientësh. Një avion i Ushtrisë franceze “Airbus” tashmë ka evakuar disa pacientë në spitale të tjerë në vend.
Të tjerët janë dërguar me helikopter në vendet fqinje, veçanërisht në Gjermani./Opinion.al
